Sindia. Bandu pùblicu.

Comuna de Sindia

Provìntzia de Nùgoro

Programma de atziones contra a sa poberesa.
Lìnea de interventu 1.

Cun sa lìnea de interventu 1 si dat un’agiudu econòmicu e/o bonos pro comporare benes de prima netzessidade, a chie tenet bisòngiu.

Sunt prevididos sussìdios econòmicos pari a € 350,00 pro unu màssimu de 12 meses sighidos, s’importu de s’agiudu podet minimare in base a su puntègiu calculadu e in base a sa disponibilidade econòmica.

Su sussìdiu econòmicu est dadu in base a sa gravidade de sa situatzione e cun atentzione prus manna a chie no est in gradu de traballare o non podet fàghere su servìtziu tzìvicu.

Pro fàghere dimanda servit su ISEE chi non nche devet colare  € 4.500,00, in casos particulares custu podet lòmpere a € 5.500,00.

Sa lìnea 1 no est cumulàbile cun sa 3.

Sos mòdulos pro sa dimanda si podent ritirare in s’ufìtziu servìtzios sotziales, sa dimanda andat presentada intro de su 10 de santuaine 2014, sos documentos de allegare sunt:

• documentu de identidade de chie presentat sa dimanda
• còpia còditze fiscale
• tzertificadu ISEE riferidu a sos rèdditos 2013, de dimandare in un’ufìtziu CAF
• documentatzione chi mustrat sa situatzione de bisòngiu e s’impossibilidade a traballare o a fàghere su servìtziu tzìvicu
• eventuales decretos de su tribunale de separatzione, afidamentu, custòdia cautelare o àteru.

A paridade de puntègiu si dat prioridade a sas famìlias cun su rèdditu prus bassu, si atzetat una dimanda ebbia pro famìlia.

Non podet presentare dimanda:

• chie no est residente in Sindia,
• chie no est residente dae a su nessi 2 annos,
• chie tenet unu ISEE chi nche colat sos € 5.500,00
• chie produet decraratziones farsas a sos sensos de su D.P.R. 445 de su 28 de nadale de su 2000,
• chie non presentat sa documentatzione dimandada,
• chie refudat percursos de agiudu comente frecuèntzia de iscola pro chie est in edade iscolàstica e formativa, 
• cura a sa pessone – assistèntzia sanitària, 
• inserimentu in atividades de volontariadu o agregatzione sotziale.

S'Amministratzione Comunale averìguat sas decraratziones fatas cun unu cunfrontu de sos datos chi sunt in su sistema informativu de su Ministeru de sas Finantzas. 

Chie decrarat su farsu perdet su deretu a s'agiudu econòmicu dadu e pagat una santzione.

Bandu cumpletu, n. 272