Riabilitatzione ecuestre pro disàbiles.

Dae s'albu pretòriu online de sa Comuna de Bortigale.

Sa Provìntzia de Nùgoro at presentadu sa candidadura sua comente Ente capofila de su Progetu IPPOTYRR2.

Sunt a disponimentu 100 voucher pro favorèssere chie cheret e tenet su deretu de fàghere riabilitatzione ecuestre.

Su voucher ispetat a chie a s’iscadèntiza de s’avisu:

• Est residente o domitziliadu in sa Provìntzia de Nùgoro
• Tenet una disabilidade tzertificada  a sos sensos de s’art. 3 commas  1 o 3 de sa l. n. 104 de su 5 de freàrgiu de su 1992, e potzat tènnere resurtados bonos dae sa frecuèntzia de sa riabilitatzione ecuestre.

Sa dimanda pro pòdere otènnere su voucher devet èssere imbiada in busta serrada a sa Provìntzia de Nùgoro, intro de mesudie de su 30 de santugaine 2014, a s’indiritzu:

Ufìtziu Europa de sa Provìntzia de Nùgoro, Pratza Italia n. 22 08100 Nùgoro.

Pro chie la cunsinnat a manos ammentamus chi s’ufìtziu protocollo est abertu dae su lunis a sa chenàbura dae sas 9.00 a mesudie.

In sa busta devet cumpàrrere s’ogetu:

“PO MARITTIMO, progetto Ippotyrr2 – Domanda per l’assegnazione del Voucher per la riabilitazione equestre”.

Su voucher arrivat a unu màssimu de 800,00 €   e si podet impreare pro pagare sa riabilitatzione (fintzas a 600,00 €)   o pro comporare atretzadura chi servit pro fàghere sa riabilitatzione (fintzas a 200,00 €).

Leghe su bandu cumpletu.