lunedì 28 aprile 2014

Tzelebratziones Die de sa Sardigna

 Pro sa die de sa Sardigna, initziativas dae su cabu de subra a su cabu de giosso.

Fintzas cust’annu in totu s’ìsula s’est festada sa die de sa Sardigna e si sighit a festare.

Su programma est sustantziosu: tres dies pro ammentare sos 220 annos dae cando nche sunt istados mandados sos piemontesos.

Sas initziativas, finantziadas dae sa Regione Autònoma de Sardigna,  interessant sas tzitades de sas bator provìntzias istòricas: Aristanis, Casteddu, Nùgoro  e Tàtari.

S’Istitutu Bellieni, chi si òcupat de limba e cultura sarda at ammaniadu unu cunvegnu: "In sos logos de Angioy" in ue s’at a tratare de Giuanne Maria Angioy dae sos tempos suos a oe, sos apuntamentos sunt duos:
  • A mangianu, dae sas 10:30 in su tzìnema de Turalva
  • A sero dae sas 5.00 in su tzineteatru Rex de Bono

In Aristanis, cras 29 de abrile, in intro de sas atividades ufitziales regionales  de sa Die de Sardigna, s’ant a presentare sos ùrtimos agiornamentos de su Curretore Regionale Ortogràficu, su programma aplicativu chi permitit de currègere testos sardos in lìnia, a oe semus lòmpidos a tènnere 40.000 lemmas.
Unu curretore ortogràficu de una limba europea si podet nàrrere de giudu e assentadu cando arribat a tènnere nessi 30.000 faeddos primàrgios. Semus duncas a su puntu in ue su traballu mannu de su “fràigu” est agabbadu, como tocat a dare cara pro infinigare custu traballu, a manera chi siat prus de gabale.

Su curretore, in sa retza, oe in die est su corpus prus mannu chi tenimus in LSC. 

Nessun commento:

Posta un commento