Libros in su Museu Sanna de Tàtari

Sighit in su Museu Sanna s'initziativa ghiada dae: - s'Ufìtziu Linguìsticu de sa Limba Sarda e Catalana, - su Servìtziu Limba Sarda de s'Assessoradu Regionale a s'Istrutzione Pùblica. Su 10 de abrile b'at a èssere su de tres apuntamentos cun sa presentada de su libru de poesias de Antoni Canu: "Les mies mans" in ue si contat de tempos colados cando galu sa gente traballaiat in sos campos. Antoni Canu est nàschidu in Otieri ma a 10 annos si nch’andat a istare a s'Alighera. Sa limba mama sua est su sardu ma, dae cando istat in s'Alighera at imparadu su catalanu chi diventat limba sua printzipale. At publicadu tres libros de poesias: "Poesies" (1995), "En l'arc dels dies" (2000) e "Nou Cant" (2007. At retzidu prèmios meda e reconnoschimentos siat a livellu natzionale chi internatzionale. Aberit sa presentada sa diretora de su Museu Gabriella Gasperetti, sighit Cristiano Becciu, funtzionàriu de su Servìtziu Limba sarda, moderat sa dibata Giuliana Portas, de s'Ufìtziu linguìsticu regionale, intervenint Fàbio Solinas, Presidente de s'Assòtziu ÀndalaNoa e Dàvide Casu, cantadore saligheresu. At a èssere presente s'autore de su libru chi at a lèghere unas cantas poesias suas. Custas initziativas promòvidas in Tàtari dae su Servìtziu Limba Sarda de sa Regione, cun sa collaboratzione de su Ministèriu pro sos benes e sas atividades culturales, servint pro dare valore a sa limba sarda e a sas variedades alloglotas de Sardigna. Sos apuntamentos ant a sighire s'8 de maju cun un'àtera presentada. Non manchedas!!!